د ۲۱ میلیونه افغانیو په ارزښت د جوزجان عامې روغتیا ریاست د واکسین آمریت او تحویلخونې د ودانیو بنسټ ډبره کېښودل شوه
په همدې موخه جوړ شويو مراسمو کې د جوزجان والي، قاري ګل حیدر شفق، د یاد ولایت د عامې روغتیا رئیس قاري ذبیح الله حسیني، د عامې روغتیا وزارت د تخنیکي کمېټې غړي زلمي جمیل او یو شمېر سیمه ییزو چارواکو او د اماراتي ادارو استازو ګډون درلود.
د جوزجان د عامې روغتیا رئیس، قاري ذبیح الله حسیني وویل: د واکسین امریت دوه پوړیزه ودانۍ به د څه باندې ۱۳ ملیونه افغانیو په لګښت او کارونه به یې ۱۱ میاشتو کې بشپړ شي او دغه راز د یادې ادارې تحویل خونه به د څه باندې ۸ میلیونه افغانیو په ارزښت او چارې به یې په ۷ میاشتو کې بشپړ شي.
د عامې روغتیا رئیس زیاته کړه، چې دا پروژه به د همکارو ادارو په مالي همکارۍ او د عامې روغتیا ریاست تر څارنې لاندې پلي شي، ترڅو په جوزجان ولایت کې د واکسینونو د اصولي او مؤثر ساتنې لپاره اړینې اسانتیاوې برابرې شي.
همدارنګه، د عامې روغتیا وزارت استازي زلمي جمیل هم ټینګار وکړ چې دغه ودانۍ د نړیوالو معیارونو پر اساس ډیزاین شوې او د واکسینونو د کیفیت ښه ساتلو لپاره به ټول اړین معیارونه په کې موجود وي.
