ننګرهار او کنړ ولایتونو کې روغتیايي کارکوونکو ته څلور ورځنی روزنیز ټریننګ ترسره شو
دا روزنیز تریننګ د عامې روغتیا وزارت د وقایوي طب لوی ریاست د غیر ساري ناروغیو د وقایې او کنټرول ډیپارټمنت له لوري د ننګرهار او کنړ ولایتونو د زلزله ځپلو سیمو د کلینیکونو ۲۵ تنو ډاکترانو د ظرفیت لوړولو په موخه د غیرساري ناروغیو د وقایې او کنټرول، لومړني تشخیص، درملنې، روغتیايي مرکزونو ته د ناروغانو راجع کولو او د غیرساري ناروغیو اړوند ناروغانو د مدیریت په برخو کې ترسره شو.
د عامې روغتیا وزارت د غیر ساري ناروغیو د وقایې او کنټرول مسؤل، ډاکتر محمد سمیع کریمي د غیر ساري ناروغیو په کنټرول کې د ډاکترانو رول اغېزمن وباله او ویې ویل: (موږ نه شو کولای چې د غیر ساري ناروغیو د کنټرول برخه کې ټول روغتیایي کارکوونکي وروزو، نو له ګډونوالو مو غوښتنه ده، چې د ټریننګ په ترڅ کې زده کړي موضوعات خپلو همکارانو ته په کلینیکونو او کلیو کې وړاندې کړي؛ تر څو په دې برخه کې د لا ډېرو کسانو د روزلو زمینه برابره شي).
