د ا.ا.ا د عامې روغتیا وزارت له لوري د توبرکلوز (TB) د کنټرول ملي برنامې د درې کلنو فعالیتونو د بیاکتنې تخنیکي غونډه ترسره شوه
په دې غونډه کې چې موخه یې د توبرکلوز د کنټرول ملي برنامې د تېرو درې کلنو فعالیتونو او لاسته راوړنو ارزونه، د نیمګړتیاوو او ستونزو حل، د راتلونکو کلونو لپاره د ستراتیژیکو پلانونو اصلاح کول او د یو ملي ستراتیژیک پلان بنسټ ایښودل و، په کې د عامې روغتیا وزارت د روغتیايي خدمتونو وړاندې کولو مرستیال ښاغلي مولوي عبدالولي حقاني، یو شمېر مرکزي رئیسانو، د اړوند ریاست مسؤلینو، روغتیا نړیوال سازمان او UNDP استازو ګډون درلود.
د روغتیايي خدمتونو وړاندې کولو مرستیال، ښاغلي مولوي عبدالولي حقاني د توبرکلوز د کنټرول ملي برنامې د مسؤلینو له هڅو او نړیوالو ادارو له همکاریو څخه مننه وکړه او زیاته یې کړه، چې د توبرکلوز د کنټرول ملي برنامه ډېر ارزښت لري او اړوند مسؤلین یې باید خپلو فعالیتونو ته په بشپړ شفافیت، اخلاص او ځیرکتیا ادامه وکړي؛ ترڅو په دې برخه کې خلکو ته لازم او اغېزمن خدمات وړاندې شي.
همدارنګه، د توبرکلوز د کنټرول ملي برنامې مسئول، ډاکټر علي محمد امین د یادې برنامې د فعالیتونو، لاسته راوړنو او نورو اړوندو چارو په اړه هر اړخیز معلومات وړاندې کړل او ویې ویل، چې د دې برنامې د فعالیتو بیاکتنه هر درې کاله وروسته ترسره کېږي؛ ترڅو شته ستونزې حل، خدمات لا معیاري او باکیفیته شي.
بل لور د نړیوالو همکارو ادارو استازو هم په یاده برخه کې خپل نظرونه او معلومات شریک کړل او هم یې په دغه برخه کې د خدماتو ښه والي په موخه یو شمېر وړاندیزونه وکړل.
