قاري عبدالولي صدیقي په کابل کې له یو شمېر روغتیايي مرکزونو څخه لیدنه وکړه
د عامې روغتیا وزارت د مالي او اداري چارو مرستیال، ښاغلي قاري عبدالولي صدیقي او مل پلاوي په کابل کې د عاجل ابن سینا روغتون، راډیولوژۍ، مرکزي لابراتوار، مرکزي پولي کلينيک او کابل امبولانس څخه لیدنې وکړې:
د دې لیدنو موخه د یادو روغتیايي مرکزونو د هغو برخو لیدنه او ارزونه وه، کومې چې د کابل ښار په پراختیايي پلان کې نړېږي؛ څو د خدماتو د دوام لپاره مناسب ځای ترتیب او د پراختیايي پلان د تطبیق په صورت کې خدمات له خنډ او ځنډ سره مخ نه شي.
دغه راز، د یادو لیدنو پر مهال ښاغلي مرستیال د روغتیايي مرکزونو بېلابېلې څانګې او تجهيزات له نږدې وليدل او د روغتیايي خدمتونو د وړاندې کېدو بهیر، د روغتیايي کارکوونکو ستونزې او د ناروغانو د وضعیت ارزونه يې وکړه.
همدارنګه، ښاغلي د روغتیايي خدمتونو پر لا ښه والي، شفافیت، چټکتیا او له مراجعینو سره د ښه چلند پر اهمیت ټینګار وکړ او اړوندو مسئولینو ته یې له اړتیاوو سره سم د معیاري او پر وخت روغتیايي خدماتو وړاندې کېدو سپارښتنې وکړې.
د یادونې وړ ده، چې د عامې روغتیا وزارت رهبري هڅه کوي؛ څو د هېواد په روغتیايي مرکزونو کې د خدماتو کیفیت لوړ او د خلکو روغتیايي ستونزو ته پر وخت رسېدنه وشي.
