د عامې روغتیا وزارت د مسلکي خالي بستونو لپاره د ازادې سیالۍ له لارې ازموینه واخیستل شوه
یاده ازموینه د عامې روغتیا وزارت د روغتیايي پراختیا او پالیسۍ مرستیال، ډاکټر محمد حسن غیاثي، د بشري سرچینو عمومي ریاست استازو، د ازموینو ملي ادارې استازو او ګڼ شمېر روغتیا پالانو په شتون کې له ۵۵۵۵ تنو ګډونوالو څخه چې ۲۷۹۴ تنه یې نارینه او پاتې نور یې ښځینه وې، د غاښونو پروتیز، نرسنګ، قابلګۍ، انستیزي او د لابراتوار په څانګو کې واخیستل شوه.
د عامې روغتیا وزارت د روغتیايي پراختیا او پالیسۍ مرستیال، ډاکټر محمد حسن غیاثي د یادې ازموینې ګډونوالو ته د شفافیت په اړه بشپړ ډاډ ورکړ او ټولو ګدونوالو ته یې د بریالیتوب او په یادو روغتیايي څانګو هېواد ته د خدمت کولو هیله څرګنده کړه.
د عامې روغتيا وزارت ژمنتيا لري چې د هيواد په ټولو روغتيايي مراکزو کې مسلکي بستونه د ازاد رقابت له لارې اعلان او د ازموينې په نتيجه کې مسلکي او وړ اشخاص استخدام کړي.
