د عامې روغتیا وزارت او ازبکستان د روغتیا وزارت ترمنځ د روغتیايي همکاریو د پراختیا په اړه لیدنه وشوه
د عامې روغتیا وزارت د خوړو او درملو مرستیال، ښاغلي مولوي حمدالله زاهد د یوه پلاوي په ملتیا ازبکستان هېواد ته د خپل رسمي سفر په ترڅ کې د دغه هېواد د روغتیا وزارت له مرستیال او د درملو د صنعت پراختیا ادارې له رئیس، عبدالله عزیزوف سره لیدنه وکړه
په دې لیدنه کې دواړو لورو د درملو، طبي تجهیزاتو، روغتیايي محصولاتو او خوړو په برخو کې د دوه اړخیزو همکاریو پراختیا، تجربو شریکولو، د تخنیکي پوهې د لېږد، تخنیکي ظرفیتونو لوړولو، سوداګریزو اړیکو پراختیا او ګډو همکاریو د پیاوړتیا په اړه بحث او خبرې تر سره کړې.
د خوړو او د درملو مرستیال ښاغلي زاهد د درملو، روغتیايي محصولاتو او خوړو د کیفیت ښه والي په موخه یې د دوه اړخیزو همکاریو پراختيا، د تجربو شریکولو، د تخنیکي پوهې د لېږد او د تخنیکي ظرفیتونو د پياوړتيا پر اهمیت ټینګار وکړ.
د ازبکستان د روغتیا وزارت مسؤلينو هم د خپل هېواد د درملو صنعت او روغتیايي محصولاتو ظرفیتونو، لاسته راوړنو او تنظيمي سیستمونو په معرفي کولو سره د افغانستان عامې روغتیا وزارت سره د تخنیکي همکاریو پراختیا، د تجربو شريکولو او د ګډو پروګرامونو پلي کولو لپاره خپل چمتووالی څرګند او د دواړو هېوادونو ترمنځ یې د همکاریو پر پياوړتيا ټینګار وکړ.
