د عامې روغتیا وزارت د روغتیایي خدمتونو وړاندې کولو مرستيال، ښاغلي مولوي عبدالولي حقاني په خپل کاري دفتر کې د هېواد د ولایتونو د عامې روغتیا له رئیســانو سره آنلاین غونډه ترسره کړه
په دې غونډه کې د روغتيايي خدمتونو وړاندې کولو مرستیال، د معالجوي طب لوی رئیس ډاکتر وحدت الکوزي، د وقایوي طب لوی رئیس ډاکتر حیدر خان حيدر، یو شمېر نورو مسئولینو او ولایتي رئیســانو ګډون درلود.
د دې غونډې اساسي موخه د مرکز او ولایتونو ترمنځ د عملي همغږۍ رامنځته کول او د هېواد په کچه د رواني ناروغانو د وضعیت ښه والی او د دې برخې پیاوړتیا وه.
په دې غونډه کې ښاغلي مولوي عبدالولي حقاني ټینګار وکړ، چې د رواني ناروغانو درملنه د عاليقدر امیرالمؤمنین حفظه الله د فرمان پر اساس یو جدي لومړیتوب دی او بايد د ټولو هېوادوالو لپاره په هر ولايت کې یو منظم، هر اړخیز او اغېزمن میکانیزم رامنځته شي، تر څو روغتیایي خدمات په مساویانه ډول وړاندې شي.
همدارنګه ښاغلي مرستيال زیاته کړه، چې د رواني ناروغانو لپاره باید یو ځانګړی، منظم او مجهز ځای ایجاد شي، تر څو د هغوی د تشخیص، پاملرنې او درملنې بهیر په معياري ډول يو مناسب مديريتي چاپېریال کې تر سره شي.
دغه راز، د ولایتونو د عامې روغتیا رئیســانو په دې غونډه کې د رواني ناروغانو د خدمتونو اړوند خپل نظرونه، ستونزې او شکایتونه شریک کړل، چې ښاغلي مرستيال ډاډ ورکړ، یادې ستونزې به و ارزول شي او د حل لپاره به یې عملي اقدامات تر سره شي.
