د عامې روغتیا وزارت د پلان او پاليسۍ لوی رياست له لوري د روغتیايي خدمتونو وړاندې کولو نوي سند د بیاکتنې او نهایي کولو وروستی ورکشاپ ترسره شو
په دې ورکشاپ کې د عامې روغتیا وزارت د روغتیايي پراختیا او پالیسۍ مرستیال ښاغلي ډاکټر محمد حسن غیاثي، د پلان او پالیسۍ لوی رئیس ډاکټر سید رسول منګل، د وزارت یو شمېر مرکزي رئیسانو، مشاورینو او متخصصینو ګډون کړی و.
د ورکشاپ د پرانیستې پر مهال د روغتیايي پراختیا او پالیسۍ مرستیال وویل: د معیاري او باکیفیته روغتیايي خدمتونو وړاندې کول د عامې روغتیا وزارت له اساسي مسؤلیتونو څخه دي. هغه زياته کړه، د دې پروسې موخه یواځې د نوي سند جوړول نه دي، بلکې د روغتیايي خدمتونو لپاره د یوه جامع، عملي، د تطبیق وړ او دوامدار چوکاټ رامنځته کول دي، چې د خدمتونو د کیفیت، عادلانه لاسرسي او د راجع کولو د يو اغېزمن سیستم زمینه به برابره کړي.
همداراز، د عامې روغتیا وزارت د پلان او پالیسۍ لوی رئيس هم د یاد سند د اهمیت په اړه وينا تر سره او ویې ویل: دغه سند د هېواد د اوسني نفوس، روغتیايي اړتیاوو او موجوده امکاناتو پر بنسټ ترتیب شوی، چې له مخې به یې د هېواد په ټولو سیمو کې د خلکو اړتیاوو ته په کتو معیاري، منظم او عادلانه روغتیايي خدمتونه وړاندې شي.
دغه راز، په دې ورکشاپ کې متخصصینو په ګروپي ډول د یاد سند لا ښه والي او معیاري کولو په موخه خپل نظرونه او وړاندیزونه شریک کړل؛ ترڅو د مسلکي نظرونو څخه په ګټې اخیستنې د روغتیايي خدمتونو نوی سند لا معیاري، جامع او د هېواد د اوسنیو اړتیاوو سره سم نهایي او چمتو شي.
