د عامې روغتیا وزارت سرپرست د زابل له والي سره وکتل
د عامې روغتیا سرپرست وزیر ډاکټر وحید مجروح، نن د زابل ولایت له والي ښاغلي احمد ګل رسولي او په پارلمان کې د دغه ولایت له استازې زهرا توخي سره په خپل دفتر کې وکتل.
په دې ناسته کې د زابل والي د دغه ولایت روغتیايي ستونزې په ځانګړې توګه په روغتیایي مرکزونو کې د درملو اکمالاتو په اړه د عامې وزارت له رهبري سره شریکې کړې او د دغه ولایت د ننګونو په حل کې یې له وزارت څخه د زیاتو همکاریو غوښتنه وکړ.
د عامې روغتیا وزارت سرپرست د دغه ولایت د روغتیایي ننګونو د اورېدو سربېره، دوی سره د ننګونو په حل کې د همکارۍ ژمنه وکړه.
دغه راز ډاکټر مجروح وویل: چې په دغه ولایت کې د درملو اکمالاتو کې د ځنډ د مخنیوي لپاره به د نړیوال روغتیا سازمان په همکارۍ د درملو کڅوړې ډېر ژر دې ولایت ته واستول شي.
هغه همدارنګه څرګنده کړه چې د زابل د روغتون د جوړولو مسله به له اړونده مسؤلینو سره شریکه کړي تر څو د رامینځته شویو ستونزو د حل په برخه کې اړین اقدامات وکړي.
