د عامې روغتیا وزارت نوماند په ولسي جرګه کې د بادغیس ولایت استازو، مخورو خلکو، مشرانو او مدني ټولنې سره وکتل
د عامې روغتیا نوماند وزیر ډاکټر احمد جواد عثماني بادغیس ولایت د خپل سفر لړ کې، په ولسي جرګه کې د یاد ولایت استازو، مخورو خلکو، مشرانو او مدني ټولنې سره د یوې ناستې په ترڅ کې بحث او خبرې وکړې.
په دې ناسته کې د بادغیس ولایت استازو په یاد ولایت کې، د روغتیایي وضعیت ښه کولو په اړه خپلې ستونزې او وړاندیزونه شریک کړل او د عامې روغتیا وزارت له رهبرۍ څخه یې په دې برخه کې د لا زیاتو همکاریو غوښتنه وکړه.
د عامې روغتیا نوماند وزیر د بادغیس ولایت استازو د ستونزو او وړاندیزونو له اورېدو وروسته هغوی سره ژمنه وکړه، چې د دې ولایت ستونزو او روغتیایي لاسته راوړنو له بیاکتنې وروسته به د روغتیا وضعیت د ښه والي په پار لازمه پرېکړه وکړي.
ډاکټر عثماني په دغه ولایت کې د یوه روغتون د جوړېدو خبر هم ورکړ او ویې ویل چې د پراختیایی آسیایی بانک په ملاتړ به په دې ولایت کې روغتیایي خدمتونو ته د خلکو د ښه لاسرسي په پار ۱۰۰ بستریز روغتون جوړ شي.
