د وچو مېوو پروسسکوونکو لپاره د خوړو خوندیتوب روزنیز پروګرام ترسره شو
د عامې روغتیا وزارت د خوړو خوندیتوب لوی ریاست له لوري د وچو مېوو پروسسکوونکو د ظرفیت لوړونې او د خوړو د خوندي صادراتي محصولاتو د ودې په موخه یو ورځنی روزنیز پروګرام ترسره شو
په دې روزنیز پروګرام کې چې ۳۰ تنه د وچو مېوو پروسسکوونکو ګډون کړی و، د خوړو د خوندیتوب اصولو، پر محصولاتو د لیبل لګولو، د صادراتو او وارداتو شرایطو او ضرورتونو، د خوړو د خوندیتوب نړیوال معیارونو (کوډکس)، د وچو مېوو د پروسس معیاري طریقو او د اروپایي ټولنې د چټکې خبرتیا سیستم (RASFF) په اړه ورته اړین معلومات وړاندې شول.
د خوړو خوندیتوب لوی ریاست مسئولینو ټینګار وکړ، چې د دې ډول روزنیزو پروګرامونو ترسره کول به د صادراتي محصولاتو د کیفیت او خوندیتوب لوړولو، د تولیدوونکو د ظرفیت پیاوړتیا او په نړیوالو بازارونو کې د افغانستان د وچو مېوو د شتون لا پیاوړتیا په موخه دوام ولري.
