هېواد والو اختر د کورنۍ د روغتیا پیغام، د سولې او هوساینې لپاره په دعاګانو سره ولمانځئ
یک شنبه، چنګاښ ۲۷/۱۴۰۰
د عامې روغتیا وزارت سرپرست، ډاکتر وحید مجروح، نن په یوه مطبوعاتي کنفرانس کې د هېواد له اوسېدونکو څخه وغوښتل چې د لوی اختر په ورځو کې په کور کې پاتې شي او د یو بل کورونو ته له ورتګ، لاس ورکولو، مخ ښکلولو او روغ بړ څخه ډډه وکړي.
د عامې روغتیا وزارت سرپرست، ټینګار وکړ که د اختر په ورځو کې خلک روغتیایي لارښوونې په پام کې ونه نیسي نو د کورونا ویروس به بیا اوج/زیات شي.
ډاکترمجروح، د کورونا ویروس له امله د هېواد د روغتیایي وضعیت په اړه معلومات ورکړل او ویې ویل: چې د کورونا ویروس درېیمه څپه صعودي حالت څخه تېره شوې ده او اوسمهال په ځینې ولایتونو کې نزولي حالت کې ده، مګر په روغتیایي مرکزونو کې د ناروغانو د شمېر ته په پام سره موږ لاهم په بېړني حالت کې یو.
هغه همداشان په تدریجي توګه د ښوونیزو مرکزونو د بیا پرانیستلو، په پاکستان او ایران هېواد کې د کورونا ویروس د خپرېدو په اړه اندېښنه څرګنده کړه او ټینګار یې وکړ که چېرې خلک روغتیایي سپارښتنې له پامه وغورځوي نو کورونا ویروس به صعودي حالت غوره کړي.
د عامې روغتیا وزارت سرپرست، د کورونا واکسین پلي کول د کورونا ویروس د مخنیوي په پار اغېزمن لار وبلله او ویې ویل: په هېواد کې د ننګونو او نا امنیو سربېره، د واکسینو د تطبیق پروسه په ټول هېواد کې دوام لري او هره ورځ شاخوا ۳۰-۴۰ زره کسان واکسین کېږي او موږ په دې هڅه کې یو چې دا بهیر په ورځ کې ۶۰ زره تنو ته ورسوؤ.
ډاکترمجروح، د خپلو خبرو په دوام وویل: چې د کورونا ویروس بحران تر څنګ د جګړې له امله بېړنیو پېښو ته لاسرسي په روغتیایي مرکزونو کې د کار فشار زیات کړی دی او موږ تل هڅه کوو چې دا وضعیت په ډېره ښه توګه مدیریت کړو.
په ورته وخت کې، د عامې روغتیا وزارت سرپرست د لوی اختر په ورځو کې د کانګو ناروغۍ/تبې د ګواښ یادونه وکړه او د هېواد له اوسېدونکو څخه یې وغوښتل چې د څارویو د حلالې پر مهال دستکش وکاروي او د ځان خوندي ساتلو په پار دې روغتیایي سپارښتنې عملي کړي.
