پکتيا ولايت کې له يو شمېر خصوصي او دولتي روغتيايي مرکزونو څخه نظارت ترسره شو
د عامې روغتیا وزارت محترم مقام د لارښوونې په اساس د خصوصي سکتور د همغږۍ او تنظیم رئیس، الحاج ډاکتر احمد خندان تر مشری لاندې ټاکل شوي هیئت د خصوصي روغتیايي مرکزونو د تشویق، ملاتړ، قانوني طی مراحلو، معیاري خدمتونو د تنظیم او د رسمي جوازونو ترلاسه کولو په موخه پکتیا ولایت کې نظارتي بهیر پیل کړ.
یاد هیئت لومړی د پکتیا ولایت د عامې روغتیا له رئیس، ډاکټر معراج ګل عادل سره وکتل او ګډ نظارتي ټیمونه یې جوړ کړل، چې دغه ټیمونو د دولتي روغتونونو تر څنګ د پکتیکا ولایت په مرکز او ولسوالیو کې له ۱۴۶ خصوصي روغتیايي مرکزونو څخه هم نظارت ترسره کړ.
په دې نظارت کې ۵ خصوصي روغتیايي مرکزونه چې جوازونه يې نه درلودل او ۱۲ غیر معياري روغتيايي مرکزونه وتړل شول او له ۹۸ نورو مرکزونو څخه لیکلي ژمنې واخیستل شوې؛ تر څو د راتلونکې یوې میاشتې په موده کې خپل اسناد بشپړ کړي او د عامې روغتیا وزارت د مقرراتو او معیارونو سره سم خپل فعالیتونه رسمي او جواز تر لاسه کړي.
د یادونې وړ ده، چې د دغه نظارت اساسي موخه د روغتیايي مرکزونو تشویق او ملاتړ، د عامې روغتیا وزارت د مقرراتو او معیارونو مراعتول، د ۱۰۸۴ او ۹۱۶ مقررو سره سم د جوازونو قانوني مراحلو بشپړول او د هېواد اوسېدونکو لپاره د معیاري خدماتو زمينه برابرول دي.
