د عامې روغتیا وزارت مرستیال په خوست کې د روغتیايي خدمتونو د ښهوالي په اړه ناسته وکړه
د افغانستان ا.ا د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني او مل پلاوي خوست ولایت ته د سفر په ترڅ کې د یاد ولایت د عامې روغتیا له رئیس، ښاغلي اکرم محمد عکرمه سره لیدنه ترسره کړه
د دې لیدنې موخه د روغتیايي ستونزو حل او د دغه ولایت د روغتیايي سکتور د اړتیاوو او ننګونو ارزونه وه.
په دې ناسته کې دواړو لورو د روغتیايي خدمتونو د وضعیت، شته ننګونو او د هغو د ښه والي پر لارو چارو خبرې وکړې.
د لیدنې پر مهال ښاغلي مرستیال ټینګار وکړ چې روغتیايي پرسونل دې د غوره روغتیايي خدمتونو وړاندې کولو ته ژمن واوسي او شته طبي تجهیزات دې په سمه او اغېزمنه توګه وکارول شي.
همدارنګه، ښاغلي وویل چې د خوست ولایت د روغتیايي سکتور د ښه والي لپاره عملي اقدامات شوي او زیاته یې کړه چې د روغتیايي خدمتونو د معیاري کېدو لپاره به په راتلونکي کې هم لازم پلانونه او پروګرامونه عملي شي.
