د کورونا ویروس د دوهمې څپې راتګ مخنیوي او دې برخه کې اقداماتو په اړه د عامې روغتیا وزارت د رهبرۍ ټینګار
د عامې روغتیا وزارت نوماند وزیر ډاکټر احمد جواد عثماني نن د ولایتونو د عامې روغتیا رئیسانو سره د ویډیو کنفرانس له لارې خبرې وکړې او لارښوونه یې وکړه چې په ټولو روغتیایي مرکزونو کې د کورونا ویروس د دویمې څپې راتګ/خپرېدو مخنیوي لپاره بشپړ چمتووالی ونیسي.
په دې ناسته کې، ډاکټر عثماني د ولایتونو روغتیايي ننګونو د حل په موخه چې کومې سپارښتنې په تېره ناسته کې د ولایتونو یو شمېر روغتیایي مسؤولینو ته ورکړل شوې وې وارزولې او د دوی د چارو د ښه تطبیق څخه یې ډاډ ترلاسه کړ.
هغه همدارنګه ټینګار وکړ چې د عامې روغتیا ټولې ولایتي ادارې/ریاستونه باید په روغتونونو کې د اکسیجن سیسټم نصبولو اړتیا په اړه د شنبه تر ورځې پورې د عامې روغتیا همغږۍ ولایتي ریاست ته خپل وړاندیزونه د بریښنالیک له لارې واستوي، ترڅو د داوطلبۍ پروسه پیل شي.
سربېره پردې، د عامې روغتیا سرپرست وزیر د عامې روغتیا ولایتي ریاستونو ته لارښوونه وکړه چې د کوويډ - 19 روغتونونو کې د ناروغانو شمېر له مخې کارکوونکي وګماري او د اضافي کار کوونکو له ګمارنې څخه دې ډډه وکړي.
له بلې خوا ، ډاکټر عثماني د کرونا پروړاندې د مبارزې لپاره د قرارداد د اوږدولو/ تمدید ولو په لړ کې د نړیوال بانک ملاتړ اعلان کړ او ویې ویل چې نړیوال بانک په افغانستان کې د کورونا په وړاندې مبارزه د نورو شپږو۶ میاشتو لپاره وغځوي.
