د هېواد په لسو ولایتونو کې د پولیو واکسین کمپاین پیل شو
کابل، د ۱۳۹۹ کال د تلې ۷مه - د افغانستان اسلامي جمهوري دولت د عامې روغتیا وزارت د خپلو روغتیایي شرکاوؤ په مرسته نن د دوشنبې په ورځ د هېواد په لسو ولایتونو کې د پولیو/ګوزڼ ضد واکسین کمپاین پیل کړ، چې پنځه ورځې به دوام وکړي. د دې کمپاین موخه دا ده چې د پکتیا، پکتیکا، خوست، غزنی ، لوګر، میدان وردګو، پروان، کندز، بغلان او نورستان ولایتونو په ۱۱۲ ولسوالیو کې د پنځه کالو کم عمره شاوخوا دوه ملیون ماشومان د پولیو ویروس پر وړاندې واکسین کړي.
د افغانستان د اسلامي جمهوریت د عامې روغتیا نوماند وزیر ډاکټراحمد جواد عثماني وویل: "د پولیو وحشي ویروس زموږ د ماشومانو روغتیا ته جدي ګواښ دی. له نیکه مرغه، د دې ویروس پر وړاندې ډېر اغېزمن او خوندي واکسین شتون لري، چې زموږ د داوطلب روغتیایي کارکوونکو لخوا په وړیا توګه د هغوی د محافظت او خوندیتوب په خاطر ورکول کېږي. زه د ماشومانو د ټولو درنو کورنیو څخه غواړم چې د پولیو/ګوزڼ وحشی ویروس د کورونا ویروس په څېر جدي ونیسي او د خپل ماشومان د کمپاین په هر پړاو کې د دې وژونکي او دایمي فلج کوونکي ناروغۍ پروړاندې واکسین کړي. په دې توګه، موږ کولی شو د نړۍ نورو هېوادونو په څېر، پولیو له خپلې خاورې څخه د تل لپاره له منځه یوسو."
د روان زیږدیز کال له پیل راهیسې، په هېواد کې د پولیو ۴۷ مثبتې پېښې ثبت شوي، چې ۳۳ يې له سویلي حوزې، ۷ پېښې يې له لویدیزې حوزې، ۳ پېښې یې سویل ختیځې حوزې، ۲ پېښې یې له ختیځې حوزې او یوه یوه پېښه له شمالي او شمال ختيځې حوزونه راپور شوي دي.
پولیو یوه دایمي فلج کوونکي او آن وژونکي ناروغۍ ده. دغه ناروغۍ درملنه نه لري او د دې ناروغۍ په وړاندې د ماشومانو د خوندي کولو او وقایه کولو یوازې خوندي او اغېزمنه لار واکسین دی. ټول ماشومان د کمپاین په هر پړاو کې د دې ناروغۍ په وړاندې باید واکسین شي. کور په کورد پولیو ضد واکسین کمپاینونو په لاره اچول یوازنۍ لاره ده چې موږ د پولیو د له منځه وړلو کې هدف ته رسوي. ځکه په دې توګه موږ کولای شو چې هر ماشوم ته لاسرسی وموندو، دغه کړنلاره په هغو هېو ادونو کې چې پولیو یې ختمه کړې ده، تطبیق او پلي شوې ده.
افغانستان او پاکستان په نړۍ کې هغه هېوادونه دي چې تر اوسه هم د پولیو/ګوزڼ اندیمیک په توګه پاتې دی.
د عامې روغتیا وزارت له ټولو کورنیو څخه غواړي چې هېڅ کوم ماشوم باید د واکسین څخه بې برخې پاتې نشي، ځکه د دې دایمي فلج کوونکي ناروغۍ څخه د ماشومانو د ژغورنې او وقایې یوازنۍ لار واکسین دی.
