د عامې روغتیا وزارت سرپرست د تخار له والي سره وکتل
د عامې روغتیا وزارت سرپرست ډاکټر وحید مجروح، د تخار له والي مولوي عبدالله قرلق او په ولسي جرګه کې د دې ولایت له استازو سره د خپل کار په دفتر کې وکتل.
په دغه لیدنه کې، د تخار والي او په پارلمان کې د دغه ولایت استازو د دغه ولایت روغتیایي ننګونې او اړتیاوې د عامې روغتیا وزارت له مشرتابه سره شریکې کړې او په دې برخه کې یې د عامې روغتیا وزارت له مشرتابه څخه د لا نورو همکاریو غوښتونکي شول.
همدارنګه دوی د اهېډ مؤسسې د کم کارۍ په تړاو چې په یاد ولایت کې د روغتیایي خدمتونو د وړاندې کولو مسؤلیت لري شکایت وکړ او ویې ویل چې دې مؤسسې له څو میاشتو را په دېخوا روغتیایي کار کونکو معاشونه نه دي ورکړي.
د عامې روغتیا وزارت سرپرست د دوی د ننګونو د اورېدو پرمهال د دغه ولایت د روغتیایي ننګونو د حل او لاسرسي په پار د همکارۍ ژمنه وکړه.
دغه راز ډاکټر مجروح وویل: د اهېډ مؤسسې تړون د روان کال د سلواغې میاشتې په لومړۍ نېټه په دې ولایت کې د کم کارۍ له امله لغوه شو او پرځای یې د بي ډي ان په نوم له بلې مؤسسې سره تړون لاسلیک شو. هغه زیاته کړه چې له دې مؤسسې سره تړون لاهم د ملي تدارکاتو ادارې لخوا نه دی لاسلیک شوی او ټاکل شوې چې د عامې روغتیا وزارت تخنیکي ټیم سبا د ملي تدارکاتو ادارې ته واستول شي ترڅو د تړون پروسې ګړندۍ او شته ننګونې حل کړي.
