د محمد علي جناح روغتون د کووېډ -١٩ مرکز د سل بسترونو ظرفیت په لرلو سره پرانیستل شو
پنجشنبه، غبرګولی ١٣/١٤٠٠
د عامې روغتیا وزارت سرپرست ډاکتر وحید مجروح، نن د محمد علي جناح روغتون د کووېډ -١٩ مرکز پرانیسته او ګټې خیستنې ته وسپاره. دا مرکز د کووېډ -١٩ د درملنې لپاره د سل بسترونو په ظرفیت، د اکسیجن د تولید دستګاه او د اړتیا وړ امکاناتو په درلودو سمبال جوړ شوﺉ دی.
د عامې روغتیا وزارت سرپرست، د دې مرکز د رامینځته کولو هدف د کورونا ناروغانو ته لاسرسی او پاملرنه وبلله او زیاته یې کړه چې دا مرکز د اکسیجن د تولید دستګاه په درلودو سمبال جوړ شوﺉ دی او له دې وروسته به د دې روغتون اکسیجن له دغه مرکز څخه تامین شي.
د عامې روغتیا وزارت سرپرست، د کورونا ویروس باندې د اخته کسانو د ډېرېدو په اړه اندېښنه څرګنده کړه او خبرداری یې ورکړی چې موږ په چټکۍ سره د یو بحران خواته ته روان یو.
ډاکترمجروح، یو ځل بیا د هېواد پر ټولو اوسېدونکو وغوښتل چې د وضعیت تر ښه کېدو له کوره بهر په ځانګړي توګه په ګڼې ګوڼې ځایونو ته له تګ څخه ډه ډه وکړﺉ او د روغتیایي سپارښتنې عملي کړﺉ.
هغه همدارنګه ټینګار وکړ چې د روغتون رامینځته کول او د بسترونو زیاتول د کورونا ویروس د مخنیوي لپاره د حل لار نه ده، د دغه ویروس د کنټرول یوازینۍ مؤثره لار د خلکو همکاري او د هېواد والو لخوا د روغتیایي سپارښتنو عملي کول دي.
د عامې روغتیا وزارت سرپرست د ټولو روغتیایي کار کوونکو په ځانګړي توګه د هغو کسانو چې د کورونا روغتونونو کې خلکو ته روغتیایي خدمتونو وړاندې کولو په پار هڅه کوي ستاینه وکړه.
د یادونې وړ ده، چې د کووېډ -١٩ دویم روغتون درې ورځې وړاندې د کابل په قصبې سیمه کې پرانسیته او ګټې اخیستنې ته وسپارل شو.
