د روغتیا نړیوال سازمان له لوري د سرطان کنټرول ملي پروګرام ته د طبي تجهیزاتو سپارل
د عامې روغتيا وزارت د سرطاني ناروغيو د تشخيص او درملنې روغتون کې د روغتیا برخې له نړيوالو همکارانو سره ناسته ترسره او د روغتیا نړیوال سازمان له لوري د سرطان کنټرول ملي برنامې ته ځینې اړین طبي تجهیزات وسپارل شول.
په دې ناسته کې چې د عامې روغتيا وزارت د روغتیايي خدمتونو وړاندې کولو مرستیال ښاغلي مولوي عبدالولي حقاني، د افغانستان لپاره د قطر هېواد سفير مردف بن علي القاشوطي، د روغتیا نړیوال سازمان استازو، مرکزي رئیسانو، د سرطان د کنټرول ملي پروګرام مسؤلینو او سرطاني ناروغيو د تشخيص او درملنې روغتون روغتیایي کارکوونکو شتون درلود، د روغتيايي همکاريو پراختيا، دوام او پياوړتيا په اړه خبرې ترسره شوې.
ښاغلي مرستیال، د روغتيا نړيوال سازمان له همکارۍ څخه مننه وکړه او ياد سازمان يې د وزارت مهم او باوري شريک وباله او ويې ويل: نننۍ غونډه يواځې د ځینو طبي تجهیزاتو د سپارلو په موخه نه ده ترتیب شوې، بلکې په ټولو برخو کې د ګډو همکاريو ښکارندويي کوي.
همدارنګه، د سرطان د کنټرول ملي پروګرام تخنيکي او علمي مرستیال ډاکټر خالد احمد خالد د سرطان د تشخيص او درملنې روغتون په اړه هر اړخيز معلومات د يو پريزنټيش له لارې وړاندې کړل.
ورته مهال، د افغانستان لپاره د قطر هېواد سفير او د روغتيا نړيوال سازمان مسؤلینو هم ويناوې ترسره او د افغانستان روغتیایي سکتور د پرمختګ لپاره يې د ورته مرستو ډاډ څرګند کړ.
