د زلزلهځپلو د روغتیايي ستونزو د ارزونې په موخه د عامې روغتیا وزارت آنلاین غونډه ترسره شوه
د عامې روغتيا وزارت د روغتيايي خدمتونو وړاندې کولو مرستيال، ښاغلي مولوي عبدالولي حقاني د بلخ او سمنګان ولایتونو د عامې روغتیا له رئیسانو سره د تېرې شپې زلزلې له امله د زیانمن شویو کسانو روغتیايي ستونزو ته د رسېدنې په موخه آنلاین غونډه تر سره کړه
دا غونډه د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني په مشرۍ د وزارت د مرکزي رئیسانو او مشاورینو په شتون کې ترسره شوه، چې په کې د سمنګان او بلخ ولایتونو د وروستۍ زلزلې له امله د زیانمن شویو کسانو روغتیايي ستونزو ته د رسېدنې په اړه بحث او خبرې تر سره شوې.
په دې غونډه کې د روغتیايي خدمتونو وړاندې کولو مرستیال، د عامې روغتیا وزارت د رهبرۍ له لوري د دې پېښې د شهیدانو کورنیو ته تسلیت ووایه او د ټپیانو لپاره یې د الله تعالی څخه د ژر روغتیا دعا وکړه.
سربیره پر دې ښاغلي مرستیال وویل: ( د عامې روغتیا وزارت رهبري ژمنه ده، چې په دې ولایتونو کې اړمنو کسانو ته ټولې روغتیايي اسانتیاوې برابرې کړي؛ ترڅو د تېرې شپې زلزلې له امله زیانمن شویو کسانو روغتیايي وضعیت ته رسېدنه تر سره شي، چې په دې برخه کې اړین اقدامات ترسره شوي دي).
دغه راز، د روغتیايي خدمتونو وړاندې کولو مرستیال د بلخ او سمنګان ولایتونو د عامې روغتیا له رئیسانو څخه وغوښتل، چې د ټپیانو په اړه د دقیق راپور ورکولو او د هغوی د روغتیايي ستونزو د حل برخه کې په لا زیاتې همغږۍ سره هر اړخیزه همکاري وکړي، ترڅو اړین اقدامات ترسره شي، چې په دې اړه د دغو ولایتونو د عامې روغتیا رئیسانو د وزارت رهبرۍ ته ډاډ ورکړ.
