د عامې روغتیا نوماند وزیر د متحده ایالاتو د سفارت له شارژ دافیر سره خبرې وکړې

د عامې روغتیا وزارت نوماند وزیر ډاکټر احمد جواد عثماني په افغانستان کې د امریکا متحده ایالاتو د سفارت له شارژ دافیر ښاغلي راس ویلسن سره د ویډیو کنفرانس له لارې بحث او خبرې وکړې.

په دغه لیدنه کې، د عامې روغتیا نوماند وزیر له راس ویلسن سره د امریکا متحده ایالاتو لخوا د افغانستان د عامې روغتیا وزارت سره د سل پایو مرسته شوي وینټېلېټرونو د کارولو او د دې دستګاه وؤ کارولو په پار د روغتیایي کارکونکو روزنې په اړه خبرې وکړې.

همدارنګه په دې کتنه کې ډاکټر عثماني د اداري فساد پر

وړاندې مبارزه د عامې روغتیا وزارت یو له مهمو لومړیتوبونو څخه وبلله او ټینګار یې وکړ چې موږ د روغتیا برخه کې په شفاف سیستم باور لرو او هغه مرستې چې د افغانستان له روغتیایي سکتور سره کېږي په شفاف او عادلانه ډول اړمنو ته لېږل کېږي.

په ورته وخت کې د امریکا سفارت شارژ دافیر ښاغلی راس ویلسن د HNTAP روغتیایي پروژو په اړه چې د MSH دفتر لخوا پر مخ وړل کېږي او URBAN Health Initiative پروژې په اړه د عامې روغتیا له نوماند وزیر سره خبرې وکړې او د افغانستان روغتیایي سکتور سره د امریکا هېواد د لا ډېرو مرستو په اړه خبر ورکړ.

په پام کې ده چې د افغانستان روغتیایي سکتور سره د مرسته شويو وېنټېلېټر دستګاه وؤ د دې برخې کارکونکو تر روزنې وروسته له اړتیا سره سم یاد شوې کمپنۍ د انجنیرانو لخوا په روغتونونو کې نصب او ګټه ترې واخیستل شي.