د عامې روغتیا وزارت د روغتیایي خدمتونو وړاندې کولو معین د کابل روغتونونو له رییسانو سره وکتل
د عامې روغتیا د روغتیایي خدمتونو وړاندې کولو معین ډاکټر وحید مجروح نن د یوې ناستې په ترڅ کې د کابل روغتونونو له رییسانو سره وکتل.
په دې غونډه کې ډاکټر مجروح د روغتونونو د بدلون او د روغتونونو کیفیت د ښه والي برنامې د پلي کېدو په اړه د ولسمشرۍ ماڼۍ د عالي مقام لر لید او ملاتړ د کابل روغتونونو له رییسانو سره شریک کړ او د دې برنامې په پلي کېدو یې خبرې او نظرونه یې تبادله کړل.
هغه همدارنګه د روغتونونو خدمتونو پرمختګ لپاره د لنډ مهاله طرحې پلي کېدو ته هم اشاره وکړه او د روغتونونو له مسؤلینو څخه یې وغوښتل چې د دې طرحې پلي کولو کې لا زیاتې هڅې وکړي.
د روغتیایي خدمتونو وړاندې کولو معین وویل: په پام کې ده چې د روغتونونو د یوځای کېدو برنامه په دوه دولتي روغتونونو کې د خدمتونو دوام او کیفیت ښه کولو لپاره د اوږدمهاله حل په توګه پیل شي.
په ورته وخت کې، د روغتونونو رییسانو د روغتونونو خدمتونو کیفیت ښه کولو لپاره د طرحې پلي کولو څرنګوالي په تړاو خپل نظریات او وړاندیزونه وړاندې کړل.
