د عامې روغتیا وزارت د څارنې او پلټنې لوی رئیس، ډاکټر عنایت الله عنایت د یوه تخنیکي ټیم په ملتیا کابل کې د ماشومانو درملنې "اندراګاندي" ملي او تخصصي روغتون څخه نظارت تر سره کړ
دغه نظارت چې موخه یې د هېواد په دولتي او خصوصي روغتونونو کې د روغتیایي خدمتونو کیفیت لوړل، هېوادوالو ته په معیاري توګه د روغتیايي خدمتونو وړاندې کول او په چارو کې د شفافیت رامنځته کول دي، په ترڅ کې یې ډاکټر عنایت الله عنایت د یاد روغتون له بېلابېلو برخو څخه لیدنه وکړه، د ناروغانو احوال یې واخیست، د هغوی د روغتیا هیله یې څرګنده او د بشپړې پاملرنې ډاډ یې ورکړ.
دغه راز، د څارنې او پلټنې لوی رئیس د پایوازانو د شکایتونو اورېدلو تر څنګ، د ناروغانو دوسیې و ارزولې او روغتیايي کارکوونکو ته یې لازمې سپارښتنې وکړې، تر څو د ناروغانو ستونزو ته د رسېدنې او درملنې برخو کې لا زیاتې هڅې وکړي.
