د عامې روغتیا وزارت رهبري په کور دننه د کورونا ویروس تشخیصیه کېټونو تولید طرحې ملاتړ وکړ
د افغانستان د اسلامي جمهوریت د عامې روغتیا نوماند وزیر ډاکټر احمد جواد عثماني په سهارنۍ غونډه کې د ډاکټر سید حسین موسوي د لابراتوار د ازموینې/ معایناتو متخصص (لشمانیا او ملاریا) د هغه پلان/طرحې هرکلی وکړ چې په هیواد کې د کورونا ویروس تشخیصیه کېټونو د تولیدولو څرنګوالي په اړه وړاندې شوی و.
ډاکټر عثماني د کورونا ویروس سره مبارزې برخه کې په هېواد دننه د ښاغلي موسوي د تشخیصیه کېټونو تولید طرحې برابرولوهرکلی وکړ او ویې ویل چې دغه طرحه به د جمهوري ریاست د چارو ادارې سره هم شریکه شي، ترڅو د افغانستان حکومت په مرسته عملي کار یې پیل شي.
ښاغلي موسوي په دې ناسته کې د خپلو ټولو توضیحاتو سره د کورونا ویروس تشخیصیه کېټو تولیدولو څرنګوالی وړاندې کړ او د عامې روغتیا وزارت مشرتابه څخه یې د ویروس تشخیصیه کېټونو تولید لپاره د اسانتیاوو چمتو کولو او تمویل/ملاتړ غوښتنه وکړه.
هغه دا هم وویل چې په هیواد کې د کورونا ویروس تشخیص کېټونو تولید نه یوازې د افغانستان حکومت لپاره ویاړ دی؛ بلکې دا د کورونا ویروس تشخیص کېټونو چمتو کولو لوړ لګښت څخه مخنیوی کوي.
