د عامې روغتیا وزارت سرپرست په افغانستان کې د یونیسف او نړیوال روغتیا سازمان له نوي استازو سره وکتل
چهارشنبه، غوایی ۱۴۰۰/۱
د عامې روغتیا وزارت سرپرست ډاکتر وحید مجروح، نن د یوې تعارفي ناستې په ترڅ کې، په افغانستان کې د یونیسف نوي استازي ښاغلي ډیويډ هرف او د نړیوال روغتیا سازمان استازي ښاغلي لو دوپینګ سره د خپل کار په دفتر کې وکتل.
د عامې روغتیا وزارت سرپرست، په افغانستان کې د دې بنسټونو د دوه نوي استازو د شتون/راتګ هرکلی وکړ او د روغتیا نړیوال سازمان او یونیسف یې د عامې روغتیا وزارت مهم همکاران وبلل.
دغه راز ډاکتر مجروح، د روغتیايي خدمتونو د کیفیت د ښه والي په پار د دواړو بنسټونو تر منځ د ګډو اړیکو په برابرولو هم ټینګار وکړ زیاته یې کړه: " هیله لرم چې د یونیسف او نړیوال روغتیايي سازمان له نوي مشرتابه سره په هېواد کې د روغتیایي سیستم د پیاوړتیا برخه کې د همکارۍ نوی فصل پیل شي، ترڅو په ګډه خپله اهداف ترلاسه کړو".
د عامې روغتیا وزارت سرپرست، د روغتیايي خدمتونو د کیفیت لوړولو لپاره د وزارت نوي پلانونو ته په اشارې سره وویل: د روغتیايي خدمتونو د کیفیت لوړول د جمهوري ریاست د عالي مقام له مهمو غوښتنو څخه ده.
له بلې خوا، په افغانستان کې د نړیوال روغتیا سازمان نوي استازي ښاغلي لو دوپینګ؛ د روغتیا سکتور سره د دې سازمان ګډې همکارۍ ته اشاره وکړه او ویې ویل: موږ ژمن یو ترڅو په افغانستان کې د با کیفیته روغتیايي خدمتونو وړاندې کولو لپاره په ګډه کار وکړو.
په ورته وخت کې، په افغانستان کې د یونیسف نوي استازي ښاغلي ډیویډ هرف؛ د دغه سازمان د دوامداره همکاریو یادونه وکړه او زیاته یې کړه: "په افغانستان کې د روغتیايي خدمتونو وړاندې کولو ته وده ورکول زموږ ګډ هدف دی او موږ ژمن یو چې د روغتیا سکتور سره په ګډه کار وکړو. "
