د عامې روغتیا وزیر د روغتیا نړیوال سازمان او یونیسف ادارې د استازو په شتون کې د اندراګاندي ماشومانو د درملنې روغتون له خدمتونو څخه لیدنه ترسره کړه
د یاد روغتون څخه د لیدنې موخه په دې روغتون کې خوارځواکو ماشومانو ته د روغتیایي خدمتونو د وړاندې کېدو له بهیر څخه لیدنه او ارزونه وه.
په دې لیدنه کې د افغانستان لپاره د روغتیا نړیوال سازمان د ختیځې مدیترانې حوزې عمومي مشرې، اغلې ډاکټر حنان حسن بلخي او مل پلاوي، د افغانستان لپاره د يونيسف ادارې مشر، ښاغلي تاج الدین اوېلا هم شتون درلود، چې د یاد روغتون د خوارځواکو ماشومانو د درملنې څانګې له خدمتونو څخه یې د نږدې لیدنې سربېره په دې روغتون کې د اکسیجن د تولید څانګې د جوړېدو له کارونو څخه ارزونه ترسره کړه.
د عامې روغتیا وزیر، ښاغلي ډاکټر قلندر عباد د میندو او خوارځواکو ماشومانو روغتیا ته پاملرنه اړینه وبلله او د خوارځواکو ماشومانو د درملنې په برخه کې یې د روغتیا نړیوال سازمان په همکارۍ ټینګار وکړ.
د عامې روغتیا وزیر همداراز د یوې غونډې په ترڅ کې چې په یاد روغتون کې جوړه شوې وه په روغتیايي سکتور کې د روغتیا نړیوال سازمان او یونیسف ادارې ونډه اړینه وبلله او له هغوی یې وغوښتل، چې د لرې پرتو سیمو اوسېدونکو ته د روغتیايي خدمتونو په رسولو، د ساري ناروغیو په کنټرول، د روغتیايي سیستم پر پیاوړتیا او د پولیو ناروغۍ په محوه کولو کې د عامې روغتیا وزارت سره همکاري وکړي.
له بل لوري د روغتیا نړیوال سازمان او یونیسف ادارې استازو د خوارځواکو ماشومانو د درملنې او روغتیايي سیستم د پیاوړتیا په برخه کې د همکارۍ ډاډ ورکړ.
په پای کې د عامې روغتیا وزیر د روان کال په ترڅ کې د پولیو واکسین لومړنی ملي کمپاین څو تنو ماشومانو ته د واکسین په تطبیق کولو سره په کامیابه توګه پای ته ورسوه.
