د عامې روغتیا وزیر د یونیسف ادارې او خوړو نړیوال سازمان له استازو سره وکتل
د افغانستان اسلامي امارت د عامې روغتیا وزیر، ښاغلي مولوي نور جلال جلالي په خپل کاري دفتر کې د یونیسف ادارې او خوړو نړیوال سازمان له استازو سره وکتل.
په دې لیدنه کې په افغانستان کې د ماشومانو له کورنیو سره د نغدي مرستو د ویش پروګرام پر څرنګوالي خبرې ترسره شوې.
د عامې روغتیا وزیر، ښاغلي مولوي نور جلال جلالي وویل، “ د عامې روغتیا وزارت ژمن دی، چې د هغه پروګرامونو د تطبیق ملاتړ وکړي، چې په مستقیم او غیر مستقیم ډول د روغتیايي وضیعت په ښه والي کې مرسته کوي ”.
د عامې روغتیا وزیر همداراز ټینګار وکړ، چې د دغه پروګرام د تطبیق چارې دې د روغتیا وزارت او تطبیق کوونکو بنسټونو ترمنځ د دوه اړخیزه همغږۍ او هوکړه لیک له لاسلیک کېدو وروسته پیل شي.
بل لور د یونیسف او خوړو نړیوال سازمان استازو په دې برخه کې د عامې روغتیا وزارت د همکارۍ څخه د مننې سربېره ټینګار وکړ، چې د یادې برنامې د تطبیق چارې به د روغتیا وزارت سره د هوکړه لیک له لاسلیک وروسته د یو ځانګړي میکانیزم له مخې په شفاف ډول د تطبیق کوونکو بنسټونو سره په همغږۍ ترسره شي.
