د لوګر ولایت عامې روغتیا ریاست ته د شاوخوا ۳۰۰ زره امریکايي ډالرو په ارزښت یو شمېر درمل او اړین طبي توکي وسپارل شول
دغه درمل او اړین طبي توکي د یونیسف ادارې له لوري یاد ریاست ته سپارل شوي، چې په کې انټي بیوټیک، عاجل درمل، درد کموونکي درمل (مسکنونه) تقویتي مواد، لابراتواري او جراحي تجهیزات شامل دي.
د لوګر د عامې روغتیا رئیس ډاکټر محمد زرک ځیرک وویل، چې دغه درمل به د روغتیايي خدماتو د کیفیت په ښه والي، د عامو او ساري ناروغیو په درملنه او همدارنګه، په بېړنیو حالاتو کې مهم رول ولوبوي او زیاته یې کړه چې یاد توکي به د اړتیا له مخې د غه ولایت روغتیايي مرکزونو ته ووېشل شي؛ څو خلکو ته پر وخت او معیاري خدمات وړاندې شي.
