د کورونا ویروس درېیمه څپه د هېواد په مرکزي او لویدیځو ولایتونو کې خپره شوې ده
شنبه، چنګاښ ۱۲/۱۴۰۰
د عامې روغتیا وزارت سرپرست، ډاکتر وحید مجروح، نن په یوه خبري کنفرانس کې د هېواد د روغتیایي وضعیت په اړه معلومات ورکړل او وویل: چې د کورونا ویروس درېیمه څپه لاهم د خپرېدو په حال کې ده او د هېواد په مرکزي او لویدیځو ولایتونو کې خپرېدل زیات شوي دي.
د عامې روغتیا وزارت سرپرست، د هېواد له اوسېدونکو وغوښتل چې د دې ویروس پر وړاندې دې بې غوري نه کوي او د روغتیایي سپارښتنو په عملي کولو سره د دې ویروس په وړاندې ځان خوندي/وقایه کړي.
ډاکترمجروح، همدارنګه په هېواد کې د تور فنګس له خپرېدو خبر ورکړ او ویې ویل چې په هېواد کې د تور فنګس درې پېښې ثبت شوې دي او دا درې واړه د کورونا ویروس باندې اخته دي.
تور فنګس یوه نادره ناروغي ده او هغه خلک چې د ضعیف بدن او شکرې ناروغي لري د دې ناروغي له ډېر ګواښ سره مخ دي. تبه، ټوخى، کانګرېدل، په پوزه او خولې کې تورې لکې او خواګرځېدل د دې ناروغي عامې نښې دي.
د عامې روغتیا وزارت، سرپرست د کورونا ویروس سره د مبارزې لپاره د دې وزارت اقداماتو ته په اشارې سره وویل: چې د هېواد په اتو ولایتونو کې د اکسیجن دستګاه وؤ د پایپ کشۍ کار بشپړ شوئ او همدا چې د اکسیجن تولید دستګاه وې هېواد ته را ورسېږي د نصب او فعال کولو کار به یې پیل شي.
یونیسف ادارې د نړیوال بانک په مرسته شاوخوا لس د آکسیجن د تولید دستګاه وې پېرودلي دي. ټاکل شوې ده چې دغه دستګاه وې د هېواد په لسو ولایتونو کې نصب شي.
ډاکترمجروح، د خپلو خبرو په دوام په هېواد کې د کورونا واکسین پلي کولو پروسې ته په اشارې سره زیاته کړه: په پام کې ده چې امریکا هېواد لخوا د جانسن-جانسن درې ملیون دوزه مرسته شوي واکسین یو نیم ملیون دوزه یې د روانې اونۍ په پای کې هېواد ته را ورسېږي. اوسمهال په هېواد کې شاوخوا ۹۱۴ زره تنه کسان په هېواد کې واکسین شوي دي.
د عامې روغتیا وزارت سرپرست د کورونا ویروس پروړاندې مبارزه کې د خلکو همکاري مهمه وبلله او له ټولو خلکو یې وغوښتل چې په دې سختو ورځو کې د عامې روغتیا وزارت سره همکاري وکړي او په روغتیایي مرکزونو کې د ډاکترانو ملاتړ وکړي.
هغه د عامې روغتیا وزارت یو بې پرې او غیر سیاسي اداره وبلله او زیاته یې کړه موږ هوډ لرو چې د هېواد په لیرې پرتو سیمو کې د هېواد اوسېدونکو ته مساوي روغتیايي خدمتونه وړاندې کړو.
