د یو شمېر ولایتونو روغتیایي ننګونې د عامې روغتیا وزارت رهبرۍ سره شریکې شوې
د عامې روغتیا وزارت د پلان او پالیسۍ معین ډاکټر بشیر نورمل؛ نن د "اتو بجو" په ناسته کې د بغلان، لغمان ، تخار او کندهار ولایتونو روغتیايي ننګونې وڅېړلې.
د یادو ولایتونو روغتیایي مسؤلینو خپلې ننګونې او اړتیاوې د ویډیو کنفرانس له لارې د اکسیجن دستګاه وؤ نصب، د پي سي آر دستګاه وې، د تشخیصیه کېټونو اکمال، په تخار ولایت کې د امنیتي ګواښونو له امله د ۲۶ روغتیایي مرکزونو بندیدل او ځینو نورو روغتیایي برخو کې د عامې روغتیا وزارت له رهبرۍ سره شریکې کړې او په دې برخه کې د یاد وزارت له رهبرۍ څخه د لا پاملرنې غوښتونکي شول.
ډاکټر بشیر نورمل د دې ولایتونو د روغتیایي ننګونو په حل کولو ټینګار وکړ او د اړوندو ادارو مسؤلینو ته یې لارښوونه وکړه چې په یادو ولایتونو کې د ستونزو د حل لپاره جدي اقدامات وکړي.
د پلان او پالیسۍ معین د خصوصي سکتور لابراتوارونو له استازو وغوښتل، هغه کسان چې د کورونا ټسټ جعل کارۍ کې لاس لري په پېژندلو کې یې د عامې روغتیا وزارت سره همکاري وکړي تر څو دوی مجازات او د قانونو منګولو ته وسپارل شي.
په ورته وخت کې، د مالي اداري معینیت سرپرست ډاکټر عبدالقدیر قدیر په ټولو ولایتونو کې د اکسیجن تولید دستګاه وؤ په نصبولو ټینګار وکړ او ویې ویل چې په ټولو ولایتونو کې د اکسیجن تولید او پي سي آر دستګاه وؤ د نصبولو پروسه روانه ده.
له بلې خوا، په دغه ناسته کې د سویډن کمیټې استازي د دې کمیټې د کارمندانو ساتنې لپاره د ناامنۍ په اړه اندیښنه څرګنده کړه او د هغوی کاري ننګونې یې د وزارت له رهبرۍ سره شریکې کړې او په دې برخه کې یې د دغه وزارت د همکارۍ غوښتنه وکړه.
