د عامې روغتیا وزارت د اندراګاندي د ماشومانو درملنې ملي او تخصصي روغتون کې د ټیليمډیسن پروګرام انلاین مشورتي غونډه ترسره شوه
په دې غونډه کې، چې د ټیليمډیسن پروګرام مسؤلینو او د مرکزي او ولایتي روغتونونو د ارتوپیدي متخصصینو او ټرینرانو ګډون کړی و، د ارتوپیدي ناروغانو د درملنې په موخه انلاین مشورې وړاندې او د ناروغانو د CT Scan، MRI او X-Ray پایلې وارزول شوې. همدارنګه، هغو ناروغانو ته چې په خپلو ولایتونو کې یې د درملنې امکانات موجود وو، هماغه ځای کې یې د درملنې سپارښتنې وشوې او هغه ناروغان چې نورو تخصصي خدمتونو ته یې اړتیا لرله، د لا زیاتو تخصصي خدماتو ترلاسه کولو لپاره مرکز ته راجع شول.
دغه راز، په یاده غونډه کې د ناروغانو د غیر ضروري راجع کېدو، د اضافي لګښتونو او وخت ضایع کېدو مخنیوي، د ولایتي ډاکټرانو ظرفیت لوړونې او د متخصصینو ترمنځ د تجربو شریکولو پر اهمیت هم بحث او خبرې وشوې.
د يادونې وړ ده، چې د ورته غونډو موخه د ولايتي روغتيايي کارکوونکو ظرفیت لوړونه او په ولايتونو کې د ناروغانو لپاره د غوره روغتيايي خدماتو وړاندې کول دي.
