د افغانستان د عامې روغتیا ملي انسټیټیوټ رئیس، ډاکټر عبدالجبار حیدر په مشرۍ د څه باندې ۲۰ ملي او نړیوالو همکارو مؤسسو له استازو سره د همغږۍ غونډه ترسره شوه
په دې غونډه کې چې د عامې روغتیا وزارت د نړیوالو اړیکو استازي هم شتون درلود، د یاد انسټیټیوټ مأموریت، تشکیلاتي جوړښت او درې اساسي کاري برخې (د عامې روغتیا څېړنې، د بشري ځواک روزنه، ظرفیت لوړونه او د روغتیا ترویج) معرفي شوې.
دغه راز، په یاده غونډه کې د همغږۍ پیاوړتیا، د تکراري فعالیتونو مخنیوي، د معلوماتو او علمي شواهدو شریکولو، د ګډو پروګرامونو پلي کولو ملاتړ او د عامې روغتیا له لومړیتوبونو سره سم د فعالیتونو ترسره کولو په اړه بحث او خبرې وشوې.
ډاکټر عبدالجبار حیدر د همغږۍ، همکارۍ او اغېزمن مشارکت پر اهمیت ټینګار وکړ او د عامې روغتیا ملي انسټیټیوټ رول یې د علمي، څېړنیزو، روزنیزو او د روغتیا ترویج فعالیتونو برخه کې تشریح کړ.
په پای کې، ګډونوالو د عامې روغتیا ملي انسټیټیوټ او همکارو مؤسسو ترمنځ د تخنیکي او علمي همکاریو پر لا پراختیا او د همغږۍ غونډو پر دوام ټینګار وکړ او د همکارو مؤسسو استازو خپل فعالیتونه او لومړیتوبونه شریک او له روغتیا وزارت سره یې د تخنیکي او علمي همکاریو د پراختیا ژمنه وکړه.
