د هېواد په نا امنه سیمو کې د ګوزڼ واکسین پر تطبیق د عامې روغتیا وزارت د رهبرۍ هڅې
د هېواد د عامې روغتیا وزیر ډاکټر احمد جواد عثماني؛ نن د پولیو واکسین مسؤلینو سره دیوې ناستې په ترڅ کې وکتل او خبرې یې وکړې.
په دې ناسته کې د ګوزڼ واکسین مسؤلینو په هېواد کې د ګوزڼ مثبتو پېښو له زیاتوالي څخه اندېښنه څرګنده کړه او د هېواد په نا امنه سیمو کې د پولیو واکسین د نه پلي کېدو او په دې برخه کې شته ننګونې د عامې روغتیا له وزیر سره شریکې کړې.
دوی ټینګار وکړ چې د ګوزڼ واکسین څلور میاشتنی ځنډ د کرونا ویروس بحران او په پاکستان کې د کرونا ویروس خپرېدو/ زیاتېدو سره په جمعي ډول له پاکستان څخه د افغان کډوالو راستنېدل د ګوزڼ ویروس د زیاتېدو لامل شوﺉ.
د عامې روغتیا وزیر په نا امنه سیمو کې د ګوزڼ واکسین د پروګرام پلي کولو پر اړتیا ټینګار وکړ او زیاته یې کړه چې دا مسله به د حکومت مسؤلینو سره شریکه شي، تر څو هغوﺉ له مخالفینو سره د هېواد په نا امنه سیمو کې په تفاهم ورسېږي او واکسیناتورانو ته اجازه ورکړي.
دغه راز ډاکټر عثماني، په دې برخه کې د یونیسف او نړیوال روغتیا سازمان رول مهم وباله او څرګنده یې کړه چې د پولیو شته ننګونې به له دغو ادارو سره شریکې کړي، ترڅو دوی د عامې روغتیا وزارت سره په دې برخه کې لا زیاته همکاري وکړي.
