د چین هېواد له افغانستان سره په مجموع ډول څلورسوه زره دوزه د کورونا واکسین مرسته کوي
د چین هېواد سفیر ښاغلي وانګ یو، نن د عامې روغتیا وزارت له سرپرست سره په لیدنه کې د افغانستان دولت سره د کورونا واکسین د دوه سوه زره دوزه نور واکسین له مرستې خبر ورکړ.
ښاغلي وانګ په مخکنۍ ناسته کې چې د عامې روغتیا وزارت له سرپرست سره يې چې درلوده د دغه هېواد لخوا د دوه سوه زره دوزه واکسین د مرستې ژمنه کړې وه چې دوه سوه زره دوزه نور د عامې روغتیا وزارت په غوښتنه د دهېواد لخوا اضافه شوئ دی، په دې سره د دغه هېواد لخوا د مرسته شوي واکسین مجموعي شمېر څلور سوه زره دوزه ته رسېدلی دی.
د عامې روغتیا سرپرست وزیر ډاکټر وحید مجروح، د چین هېواد د دې مرستې له امله مننه وکړه او د کورونا واکسین یې د روغتیا سکتور لپاره د دې ویروس په مهارولو کې یوه مهمه اړتیا وبلله.
هغه همدارنګه د چین هېواد د عامې روغتیا وزارت ښه ملګری وباله او په افغانستان کې د کورونا بحران په اوج کې د دې هېواد مرستې خورا ګټورې او ارزښتناکې وګڼلې.
د عامې روغتیا سرپرست وزیر د چین هېواد له سفیر څخه وغوښتل چې د جمهوریت روغتون د طبي دستګاه وؤ په فعالولو کې د عامې روغتیا وزارت سره مرسته وکړي.
له بلې خوا، ښاغلي وانګ په افغانستان کې د چین هېواد د همکاریو پر دوام ټینګار وکړ او زیاته یې کړه چې د کورونا ویروس بحران د جمهوریت روغتون د طبي وسایلو په فعالولو کې د دغه هېواد همکارۍ وځنډولې او د کورونا ویروس د رامینځته شوي وضعیت له نورمالېدو سره سم به په دې برخه کې زموږ د همکاریو بهیر پیل شي.
