د کورونا ویروس درېیمې څپې پر وړاندې د مبارزې په پار د روغتیایي ادارو د کړنو څرنګوالی وارزول شو
سه شنبه، غبرګولی ۱۸/۱۴۰۰
د عامې روغتیا وزارت سرپرست ډاکتر وحید مجروح، نن د ویډیو کنفرانس له لارې د یوې ناستې په ترڅ کې په مرکز او ولایتونو کې د کورونا ویروس درېیمې څپې پر وړاندې مبارزه کې د روغتیایي ادارو د کړنو څرنګوالی وارزؤ.
په دې ناسته کې د عامې روغتیا وزارت د ولایتونو د تخنیکي کمېټو مسؤولینو خپلې کړنې او ننګونې د عامې روغتیا وزارت له مشرتابه سره شریکې کړې.
د عامې روغتیا وزارت سرپرست د کورونا ویروس درېیمې څپې پروړاندې مبارزه کې د روغتیايي پرسونل کړنو د بیاکتنې سربېره د مرکز او ولایتونو د عامې روغتیا ریاستونو د اړتیاوؤ د ژر تر ژره لاسرسي په پار کمېټې وټاکلې.
ډاکترمجروح د دې ناستې په دوام، په لسو ولایتونو کې د اکسیجن پلنټ دستګاه وو د نصب چې جدي اړتیا ورته لري، په ولایتونو کې په کورونا ویروس د اخته کسانو پر وخت معلوماتو وړاندې کولو، د ګړندي پي سي آر ټېسټونو زیاتول، د خصوصي لابراتوارنو څخه څارنه، د کورونا په برخه کې د تجربه لرونکو کسانو ګمارنه، د آر آر ټي ټیمونو ټاکل او د ټولو ولایتونو لپاره د وي ټي سي ضرورتونو د برابرولو په اړه له ګډونوالو سره خبرې وکړې او په دې برخه کې یې لازمې لارښوونې وکړې.
سربېره پردې، د عامې روغتیا وزارت سرپرست ولایتي روغتیایي مرکزونو ته د درملو په رسولو او د اکسیجن کمبود په له منځه وړلو ټینګار وکړ.
