د عامې روغتیا وزارت د تخصصي پروګرام لس فصده ارزونه پیل کړه
د عامې روغتیا وزارت د اکمال تخصص لوی ریاست تل هڅه کوي، چې د علمي معیارونو په پلي کولو سره د تخصص پروګرام غني کړي او په هېواد کې د تخصصي روغتیايي خدمتونو د وړاندې کولو لپاره د ډاکټرانو د پوهې کچه لوړه کړي.
د عامې روغتیا وزارت د حکمونو پر بنسټ، د دوهم دور لس فصده ازموینه د ۱۴۰۴ هـ ش کال د لیندې (قوس) میاشتې په ۳مه نېټه د تخصصي روغتونونو د استادانو په همکارۍ پیل شوه.
دغه بهیر په رسمي ډول د ترتیب شوي جدول له مخې په ۲۶ تخصصي څانګو کې د مرکز تخصصي او د متممو تخصصي (نظامي او خصوصي) روغتونونو د ټولو ټرېني ډاکټرانو لپاره پيل شو.
یاد بهیر به د ۱۴۰۴ هـ ش کال د قوس میاشتې تر ۲۸ نېټې پورې په ټولو یادو مرکزونو کې په مسلسل ډول دوام ولري. دغه ازموینه به له معیارونو او درسي پروګرام (کریکولم) سره سمه د اکمال تخصص لوی ریاست د باصلاحیته استازو تر څارنې لاندې ترسره کېږي.
