په کابل کې د ۱۰۰ بستریز د زړه ناروغیو روغتون د جوړېدو په اړه انلاین ناسته ترسره شوه
د عامې روغتیا وزارت مسؤلینو د اسلامي پراختیايي بانک او د بنګله دېش د (DDCL) شرکتونو له استازو سره په کابل ښار کې د زړه ناروغیو درملنې ۱۰۰ بستریز روغتون د جوړېدو په موخه انلاین ناسته ترسره کړه
په دې ناسته کې د عامې روغتیا وزارت د نړیوالو اړیکو، مرستو د همغږۍ او انسجام رئیس مولوي محمد داوود منصوري، د معالجوي طب لوی رئیس ډاکټر وحدت الکوزي، د پلان او پالیسۍ لوی رئیس ډاکټر سید رسول منګل، د مقام ارشد مشاور ډاکټر حدیدالله ذاکري او د ساختماني چارو مسؤل انجنیر میرویس رحیمي ګډون درلود، د یاد روغتون د پروژې پر ماسټر پلان، اسنادو او تفصیلي طرحې بحث او خبرې تر سره شوې.
د اسلامي پراختیایي بانک او د بنګلهدېش د شرکتونو استازو د روغتون جوړېدو اړوند ماسټر پلان، اسناد او تفصیلي طرحه د پریزنټېشن له لارې تشریح کړه، چې له اورېدو وروسته د عامې روغتیا وزارت مسؤلینو د طرحې د لا ښه والي په موخه خپل نظرونه شریک او له یادو لوریو یې وغوښتل، چې د روغتون اړوند اسناد له وزارت سره شریک کړي، تر څو پرې هر اړخیزه ارزونه ترسره شي.
ټاکل شوې ده، چې د دې موضوع په اړه راتلونکې ناسته په نږدې وخت کې د عامې روغتیا وزارت مسؤلینو او د اسلامي پراختیایي بانک او د بنګلهدېش د (DDCL) شرکتونو د استازو ترمنځ په حضوري ډول ترسره شي.
