محترم مولوی عبدالولی حقانی، معین عرضه خدمات صحی وزارت صحت‌عامه، با نماینده گان کمیته بین‌المللی صلیب سرخ (ICRC) در دفتر کاری خود دیدار کرد
در این نشست که شماری از رئیسان مرکزی وزارت صحت‌عامه، محترم گیراد شمیت از دفتر مرکزی کمیته بین‌المللی صلیب سرخ و محترم پاتریک مویهو، رئیس این کمیته برای افغانستان نیز حضور داشتند، از سوی کمیته بین‌المللی صلیب سرخ استراتیژی پنج‌ساله پروژه توان‌بخشی فزیکی افراد دارای معلولیت به مقام وزارت صحت‌عامه ارائه شد.
محترم معین عرضه خدمات صحی وزارت صحت‌عامه از همکاری کمیته بین‌المللی صلیب سرخ در این بخش قدردانی کرد و گفت: « تمام فعالیت‌ها در بخش صحت باید با هماهنگی وزارت صحت‌عامه اجرا شود و با پالیسی عمومی این وزارت هم‌خوانی داشته باشد.»
همچنان، محترم حقانی با اشاره به تجهیز و حمایت از بخش‌های عاجل شفاخانه‌های مرکزی و شفاخانه توان‌بخشی فزیکی افراد دارای معلولیت، تأکید کرد که تمام فعالیت‌ها در بخش صحت باید با هماهنگی بخش‌های تخنیکی مربوطه و تحت رهبری وزارت صحت‌عامه صورت گیرد.
