د تخار ولایت په چاه آب ولسوالۍ کې د اته میلیونه افغانیو په ارزښت یوه روغتیايي ځاله جوړه او ګټې اخیستنې ته وسپارل شوه
یاده څانګه د عامې روغتیا وزارت د لومړنیو روغتیايي خدمتونو رئیس ډاکټر ذبیح الله حارث، د ټولنې پر کچه د روغتيايي کارکوونکو آمر ډاکټر محمد اصف صميم او مل پلاوي له لوري د یو لړ مراسمو په ترڅ کې پرانیستل شوه.
د عامې روغتیا وزارت د لومړنیو روغتیايي خدمتونو رئیس، ډاکټر ذبیح الله حارث د یادې روغتیايي ځالې جوړېدل د سیمې اوسېدونکو لپاره د روغتیايي خدمتونو د لاسرسي په برخه کې مهم ګام وباله او ویې ویل: د دې مرکز له فعالېدو سره به د خلکو روغتيايي ستونزې تر ډېره حل او له غوره خدماتو به برخمن شي.
دغه راز، ډاکټر محمد اصف صميم وويل: د عامې روغتیا وزارت هڅه کوي چې د هېواد په بېلابېلو سیمو کې د روغتیايي خدمتونو د کیفیت او لاسرسي ښه والي لپاره اړینې اسانتیاوې رامنځته او د خلکو اړتیاوو ته په کتو روغتیايي مرکزونه پیاوړي کړي.
