دبحرآباد روغتیايي مرکز لپاره نوې ودانۍ جوړه او ګټې اخیستنې ته وسپارل شوه
۱۴۰۱/۰۷/۱۸ دوشنبه
د ۲۵۰ زره امریکايي ډالرو په ارزښت د بهسودو ولسوالۍ دبحراباد روغتیايي مرکز لپاره نوې ودانۍ جوړه او ګټې اخیستنې ته وسپارل شوه.
د بهسودو ولسوالۍ اړوند بحراباد اساسي روغتیايي مرکز لپاره نوې ودانۍ چې د ملګرو ملتونو د کډوالو ادارې په مالي همکارۍ د ۲ کالو په موده کې جوړه شوې، نن د ننګرهار د عامې روغتیا رئیس ډاکټر امیر محمد افتاب، د بهسودو دره نور او ښیوې ولسوالیو د رړغتیا مسؤل ډاکټر سمیع الحق جمال، ریاست همکارانو، په ختیځ کې د UNHCR مشر ویلیم ایجالو، د سیمې اوسیدونکو او مشرانو په شتون کې د یو لړ ځانګړو مراسمو او د پټۍ پريکولو په ترڅ کې رسماً افتتاح او ګټې اخیستنې ته وسپارل شوه.
د ننګرهار عامې روغتیا رئیس ښاغلي افتاب د UNHCR ادارې څخه مننه وکړه چې د روغتیايي مرکز لپاره یې یوه مجهزه او معیاري ودانۍ جوړه او د سیمې اوسیدونکو په واک کې یې ورکړه. همدارنګه یې ترې د روغتیا په برخه کې د نورو مرستو او همکاریو غوښتنه وکړه.
دغه راز د سیمې اوسیدونکو د عامې روغتیا رئیس او د UNHCR ادارې مشر د دستار په تړلو ونازول او د هغوی د خدمتونو قدرداني یې وکړه. همدارنګه هغه کارکوونکي وستايل شول چې د ودانۍ په جوړولو کې یې په بیلابیلو برخو کې هڅې او کوششونه ترسره کړي و.
