معین عرضهٔ خدمات صحی فعالیت‌های مراکز صحی را در ولایت پکتیکا ارزیابی کرد

محترم مولوی عبدالولی حقانی، معین عرضهٔ خدمات صحی وزارت صحت‌عامه، در جریان سفرش به ولایت پکتیکا، همراه با یک هیأت تخنیکی از شفاخانهٔ ولایتی این ولایت، مرکز صحی جامع متاخان، مرکز صحی اساسی یوسف‌خیل، مرکز صحی فرعی میست و شفاخانهٔ ولسوالی خیرکوت این ولایت دیدار کرد.

محترم معین عرضهٔ خدمات صحی از بخش‌های مختلف مراکز صحی یادشده بازدید نموده، مشکلات موجود را مشخص کرد و به‌منظور حل آن‌ها، توصیه‌های لازم را به مسئولان مربوط و کارکنان صحی ارائه نمود تا از ایجاد هرگونه مانع و تأخیر در روند ارائهٔ خدمات صحی جلوگیری شود. وی همچنان از بیماران احوال‌پرسی کرده، مشکلات آنان را شنید و به کارکنان صحی توصیه نمود تا ضمن برخورد نیک با مراجعین، به مشکلات صحی آنان به‌موقع رسیده گی کنند.

این دیدارها به‌منظور بهبود خدمات صحی صورت گرفت و به مسئولان مربوط در زمینهٔ حل مشکلات موجود و بهبود هرچه بیشتر خدمات، توصیه‌های لازم ارائه گردید.