د غزني ولایت د ۱۲ روغتیايي مرکزونو کارکوونکو ته د “ نوې زېږېدنې او ماشومتوب د دورې د ناروغیو هر اړخیزو اهتماماتو ” تر عنوان لاندې یوولس ورځنی روزنیز پروګرام پای ته و رسېد

په همدې موخه جوړو شوو مراسمو کې د عامې روغتیا وزارت د مقام د دفتر رئیس، ښاغلي مولوي محمدحسن محمدزي، روغتیايي مسئولینو او د تطبیق کوونکې مؤسسې استازو ګډون کړی و.

د عامې روغتیا وزارت د مقام د دفتر رئیس، ښاغلي مولوي محمد حسن محمدزي یادو مراسمو ته د اسلام له نظره د ماشومانو پر روغتیا خبرې وکړې او د پروګرام له ګډونوالو يې غوښتنه وکړه چې د ترلاسه کړې پوهې څخه د ماشومانو د ناروغیو د تشخیص او درملنې په برخه کار واخلي؛ څو د ماشومانو د ناروغیو او مړینې په برخه کې کمښت رامنځته شي.

ښاغلي رئیس همداراز وویل، د روغتیايي عامه پوهاوي په برخه کې دا او دې ته ورته روزنیزو پروګرامونو ته ډېره اړتیا ده او ګډونوال دې په پوره ایماندارۍ تر ولسونو و رسوي.

یاد روزنیز پروګرام د AADA مؤسسې له لوري په لاره اچول شوی و چې ګډونوال به یې د غزني ولایت په روغتیايي مرکزونو کې تطبیق کړي.