د افغانستان ا.ا. د عامې روغتیا وزیر، ښاغلي مولوي نور جلال جلالي د سرطاني ناروغیو تشخیص او درملنې ملي او تخصصي روغتون څخه لیدنه وکړه
د عامې روغتیا وزیر د روغتون بېلا بېلې څانګې وليدې، د ناروغانو احوال یې له نږدې واخيست، د هغوی ستونزې او اړتیاوې یې واورېدې او د روغتون د خدمتونو څرنګوالي په اړه یې له مسؤلینو معلومات ترلاسه کړل.
ښاغلي وزير همداراز، د دغه روغتون له مسؤلينو او روغتیايي کارکوونکو سره د ناستې پر مهال وویل: د سرطاني ناروغانو درملنه ځانګړې پاملرنې، مسؤلیتپذیرۍ او مسلکي چلند ته اړتيا لري؛ له همدې امله باید ناروغانو ته پر وخت، باکیفیته او له اړتیاوو سره سم خدمات وړاندې او د مراجعینو ستونزو ته جدي پاملرنه وشي.
سربېره پر دې، هغه مسوولینو ته سپارښتنه وکړه چې د روغتیايي خدمتونو د کیفیت لا ښه والي، د ناروغانو د ستونزو حل او د شته امکاناتو څخه د اغېزمنې ګټې اخيستنې لپاره لازمې هڅې تر سره کړي.
