د عامې روغتیا وزارت د روغتیایي پراختیا او پالیسۍ معینیت کې د EPHS او BPHS روغتیایي کڅوړو د بیاکتنې په موخه ناسته ترسره شوه
په دې ناسته کې د عامې روغتیا وزارت د روغتیایي پراختیا او پالیسۍ مرستیال ښاغلي ډاکټر محمد حسن غیاثي، د معینیت مشاورینو، یو شمېر مرکزي رئیسانو، د روغتیا نړیوال سازمان، یونیسف او تطبیقوونکو مؤسسو استازو ګډون درلود.
د روغتیایي پراختیا او پالیسۍ مرستیال د EPHS او BPHS روغتیایي کڅوړو د معیاري کولو، د خدماتو د کیفیت لوړولو او د خدمت رسونې سیستم د ښې همغږۍ پر اړتیا ټينګار وکړ او زیاته یې کړه،د مدغم روغتیایي سیستم د جوړولو لپاره دې علمي او تخنیکي اصولو ته پوره توجه وشي.
دغه راز، ښاغلي مرستیال وویل، ټولې پرېکړې دې د هېوادوالو د اړتیاوو پر بنسټ وشي، شفافیت ته دې پوره پاملرنه وشي او هم دې لګښتونه په نظر کې ونیول شي، څو د خلکو لپاره اغېزمنې او هر اړخیزې خدماتي کڅوړې رامنځته شي.
د یادې ناستې پر مهال د یو مدغم روغتیایي سیستم او ګډې روغتیایي کڅوړې د جوړولو لپاره ځانګړې کميټه هم رامنځته شوه، چې دا کميټه به خپل کار په دوامداره توګه ترسره کوي؛ ترڅو د هېوادوالو لپاره هر اړخیزې، باکیفیته او اغېزمنې روغتیایي خدماتي کڅوړې ترتیب شي.
همدارنګه، د ناستې ګډونوالو د خپلو نظریاتو وړاندې کولو ترڅنګ د روغتیایي کڅوړو د پرمختګ او معیاري کولو لپاره خپل وړاندیزونه شریک کړل.
