بېړنیو پېښو ته لاسرسی د عامې روغتیا وزارت له لومړیتوبونو څخه دی
یکشنبه، چنګاښ ۲۰/۱۴۰۰
د عامې روغتیا وزارت سرپرست، ډاکتر وحید مجروح، نن د یوې ناستې په ترڅ کې د روغتیایي شریکانو او مرستندویه بنسټونو له استازو سره په روغتیايي مرکزونو کې بېړنیو پېښو ته په لاسرسي ټینګار وکړ.
ډاکترمجروح، وویل اوسمهال موږ د تېرو شلو کلونو په پرتله د کورونا ویروس او د بېړنیو پېښو د زیاتېدو له امله په خراب وضعیت کې واقع یو، د کورونا ویروس پر وړاندې د مبارزې ترڅنګ له جګړې څخه متاثره شوي ټپیانو ته لاسرسی زموږ په لومړیتوب کې دی.
د عامې روغتیا سرپرست، د ټولو مرستندویه ادارو د همکاریو څخه چې تر دم ګړي یې د عامې روغتیا وزارت سره مرسته او ملاتړ کړی دی قدردانی وکړه او له هغوی یې وغوښتل چې د بېړنیو کېټونو په برابرولو او د روغتیايي مرکزونو په تجهیز کې چې په اوسنیو شرایطو کې جدي اړتیا ده له دغه وزارت سره مرسته وکړي.
ډاکترمجروح، همدارنګه د نړیوال روغتیایي سازمان له استازي هم وغوښتل چې ددغه وزارت د اړونده ادارو سره په همکارۍ په روغتیایي مرکزونو کې یوه نیاز سنجي ترسره کړي او د هغه مطابق دې له روغتیایي مرکزونو سره د طبي امکاناتو او تجهیزاتو همکاري وکړي.
همدارنګه، د روغتیایي شریکانو استازو د عامې روغتیا وزارت سره پرخپلې ګډې همکارۍ ټینګار وکړ او په یادو برخو کې یې د همکارۍ ژمنه وکړه.
