د روغتیایي خدمتونو وړاندې کولو څرنګوالی د څارنې عالي کمېټې په غونډه کې تر بحث لاندې ونیول شو
سه شنبه، زمری ۱۲/۱۴۰۰
د څارنې عالي کمېټې غونډه، نن د عامې روغتیا وزارت د سرپرست ډاکټر وحید مجروح، په مشرۍ د ملي او نړیوالو روغتیایي همکارانو په شتون کې جوړه شوه.
په دې غونډه کې، د اړونده څانګومسؤولینو د کورونا ویروس پروړاندې د مبارزې مدیریت کولو څرنګوالي، د کورونا واکسین پلي کولو پروسې، د روغتیایي ادارو له کړنو څخه د درېیمې ډلې د ارزونې پایلې، د اساسي او روغتوني روغتیایي خدمتونو وړاندې کول او نورو مهمو روغتیایي مسلو په اړه خپل کاري راپورونه وړاندې کړل.
د عامې روغتیا وزارت سرپرست، د روغتیايي خدمتونو په پیاوړي کولو کې د روغتیایي همکارانوله همکارۍ په ځانګړي توګه د سره صلیب کمېتې او بې پولې ډاکټرانو بنسټ لخوا چې په دې جګړه ییز حالت کې د هلمند او کندهار د ولایتي روغتونونو ملاتړ کوي مننه او قدردانی وکړ.
د روغتیایی خدماتو وړاندې کولو څرنګوالي په اړه د نظارت عالي کمیټې په غونډه کې بحث وشو
ډاکترمجروح، د ټولو روغتیایي کار کوونکو له کړنو څخه چې په دې نازک او بحراني حالت کې د هېواد په خورا ناامنو سیمو کې په روغتیایي مرکزونو کې دي او د خلکو د ژوند ژغورلو لپاره هڅه کوي مننه وکړه.
هغه دغه راز، له روغتیایي شریکانو سره د عامې روغتیا وزارت پر ګډې همغږۍ باندې هم ټینګار وکړ او له روغتیایي شریکانو څخه يې وغوښتل چې په دې حساس وضعیت کې چې د کار فشار د جنګي وضعیت او د کورونا پانډمۍ له امله په روغتیایي مرکزونو باندې زیات شو ئ د عامې روغتیا وزارت سره لا زیاته همکاري وکړي.
ډاکترمجروح، د کورونا ویروس په کنټرول او مبارزه کې د عامې روغتیا وزارت فعالیت ته په اشارې سره وویل چې د کورونا ویروس درېیم څپې پروړاندې مبارزه دوام لري او روغتیایی مرکزونه د اسانتیاوؤ له اړخه تجهیز شوي او د روغتیایي کار کوونکو ظرفیت پیاوړی شوئ.
د عامې روغتیا سرپرست، د خپلو څرګندونو په دوام وویل چې د کورونا واکسین د پلي کولو پروسه په ټول هېواد کې په جدي توګه دوام لري.
