۳۰۰ تنه معتادین د ابن سینا زربستریز روغتون کې د درملنې دورې تر بشپړولو وروسته خپلو کورونو ته ستانه شول
د افغانستان د اسلامي جمهوریت د عامې روغتیا وزارت په مخدره توکو ۳۰۰ تنه روږدي کسان چې د پاملرنې او درملنې دوره يې د ابن سینا زربستریز روغتون کې بشپړه او روغ شوي وؤ نن د یوې ناستې په ترڅ کې رخصت شول.
دغه ۳۰۰ تنه د درملنې لپاره له ننګرهار ولایت څخه د ابن سینا د معتادینو زر بستریز روغتون ته انتقال شوي وؤ.
د عامې روغتیا وزارت نوماند وزیر ډاکټر احمد جواد عثماني د دې روږدو/معتادینو درملنه په هېواد کې د روږدو کسانو د درملنې کمولو برخه کې لویه بریا وبلله او ویې ویل: د ننګرهار ولایت روږدو کسانو درملنې برخه کې د لاسرسي په پار موږ تصمیم ونیو، چې د دې ولایت یوشمېر روږدي کسان کابل ته انتقال او د تر پاملرنې لاندې یې ونیسو، چې په خوښي سره نن یې د درملنې دورې تر بشپړولو وروسته روغ او له خپلو کورنیو سره یوځای کېږي.
د عامې روغتیا وزارت نوماند په هېواد کې د معتادینو د درملنې د زیاتوالي پر اړتیا ټینګار وکړ او یادونه یې وکړه چې دغه وزارت په هېواد کې د معتادینو د کمولو لپاره د برنامې له بیاکتنې وروسته به يې د دغه وزارت په اساسي برنامو کې ځای پرځای کړي.
د عامې روغتیا نوماند وزیر د خپلو خبرو په دوام وویل: چې دا مهال ۲.۵ ملیون تنه په هېواد کې له نشه یې توکو څخه استفاده کوي چې له دې جملې څخه نږدې نیم ملیون په نشه یي توکو روږدي دي.
هغه همدارنګه په کابل کې په نشه یي توکو د روږدو کسانو د درملنې مرکرونو له ډېرولو خبر ورکړ او څرګنده یې کړه چې د کابل ښاروالۍ په همکارۍ به په کابل کې په نشه یي توکو روږدو کسانو د درملنې څو مرکزونه جوړ شي.
په ورته وخت کې په ولسي جرګه کې د ننګرهار ولایت د خلکو استازې میرمن انیسه عمراني د عامې روغتیا وزارت له رهبرۍ څخه د دې شمېر معتادینو د درملنې په برخه کې د هغوی د هڅو له امله مننه وکړه او د ډاکټرانو هڅې یې وستایلې چې د دې معتادینو د درملنې لپاره کار کوي.
له بلې خوا د کورنیو چارو وزارت د مخدره توکو پر وړاندې د مبارزې رئیس ښاغلي محمد کبیر ابراهیم خېل په هېواد کې د مخدره توکو کارول یوه جدي ننګونه بولي او ټینګار کوي چې د کورنیو چارو وزارت د مخدره توکو قاچاق کونکو او اکمال کونکو د موندلو او نیولو برخه کې هېڅ ډول هڅه ونه سمپوي.
د یادونې وړ ده چې په کابل کې د روږدو کسانو د راټولولو کمپاین په دوام به ۴۰۰ تنه نور روږدي کسان د دغه وزارت لخوا راټول او تر درملنې لاندې ونیول شي.
