پکتیکا ولایت کې د کتلوي معافیت ودانۍ جوړولو د بنسټ ډبره کېښودل شوه
دغه ودانۍ د عامې روغتیا وزارت په هڅو او همغږۍ د یونیسیف ادارې په مالي او تخنیکي همکارۍ د شاوخوا دیارلس میلیونه افغانیو په لګښت جوړیږي، چې رغنیزې چارې به یې د شپږ میاشتو په موده کې بشپړې شي.
په همدې موخه جوړو شویو مراسمو کې د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني، د وزارت یو شمېر مرکزي رئیسانو، د پکتیکا والي ښاغلي مولوي عبدالخالق عابد، د عامې روغتیا رئیس ډاکټر عبدالله جان حقمل، د یونیسیف ادارې مسؤلینو او روغتیا پالانو ګډون کړی و.
د روغتیايي خدمتونو وړاندې کولو مرستیال، ښاغلي مولوي عبدالولي حقاني د یادې ودانۍ جوړول روغتیا برخه کې د شوې ژمنتیا برخه وبلله، دا کړنه یې د پکتیکا اوسېدونکو لپاره یوه ستره لاسته راوړنه یاده کړه او ویې ویل: «د عامې روغتیا وزارت په خپل ټول توان هڅه کوي، چې د هېوادوالو ستونزو او غوښتنو ته رسېدنه تر سره او روغتیايي خدمتونه لا پیاوړي او معیاري کړي».
دغه راز د پکتیکا والي، مولوي عبدالخالق عابد وویل: «دا ولایت پراخه اراضي لري او خلک یې روغتیا برخه کې لا ډېرو اسانتیاوو ته اړتیا لري، چې باید د شته خدمتونو سربېره ورته ځانګړې پاملرنه وشي».
