د نورستان ولایت د کامدېش ولسوالۍ او غور ولایت د شهرک ولسوالۍ عمومي روغتونونو د جوړولو افر پرانیستې پروسه ترسره شوه
یاده پروسه د عامې روغتیا وزارت د پلان ګذارۍ او برنامه ریزۍ رئیس، ډاکټر عبدالستار صحت، د افر پرانیستې پروسې مسؤلینو او د دولسو ودانیزو شرکتونو د استازو په شتون کې ترسره شوه.
په همدې موخه جوړه شوې ناسته کې د پلان ګذارۍ او برنامه ریزۍ رئیس، ډاکټر عبدالستار صحت وویل: «دغه پروسه په بشپړه توګه شفافه ده او له هغه شرکت څخه چې بریالی کېږي، هیله لرو کارونه په دقیق او ټاکلي وخت د عامې روغتیا وزارت له شرطونو سره سم ترسره کړي؛ ځکه چې دا د عامه ګټو پروژه ده او موږ به یې له چارو څخه نظارت کوو».
بل لور، د ودانیزو شرکتونو استازو ژمنه وکړه، که په دې پروسه کې بریالي شي، د عامې روغتیا وزارت له معیارونو سره سم به عمل ترسره کړي.
د یادونې وړ ده، د عامې روغتیا وزارت د هېواد په ۳۱۸ ولسوالیو کې د عمومي روغتونو د جوړولو پلان لري، چې د یادې پروسې تدارکاتي چارې دوام لري.
