د افغانستان د عامې روغتیا وزیر او د روسیې سفیر د روغتیايي همکاریو پر پراختیا خبرې وکړې
د افغانستان ا.ا د عامې روغتیا وزیر، ښاغلي مولوي نور جلال جلالي په خپل کاري دفتر کې د روسیې هېواد له سفیر، ښاغلي دیمیتري ژیرنوف (Dmitry Zhirnov) او مل پلاوي سره لیدنه ترسره کړه:
د دې لیدنې پر مهال روغتیا برخه کې د دوه اړخیزو همکاریو پیاوړتیا او پراختیا، د سرطان او زړه ناروغیو برخه کې د افغان متخصصینو روزلو او ظرفیت لوړلو، د تجربو شریکولو په موخه روسیې هېواد ته د افغان پلاوي د سفر زمینې برابرولو، د لنډ مهال لپاره روسیې څخه افغانستان ته په مناسب قیمت د باکیفته درملو وارېدولو او د درملو تولید برخه کې د روسیې هېواد د پانګوالو پانګه اچونې په اړه بحث او خبرې ترسره شوې.
د عامې روغتیا ښاغلي وزیر د روسیې پلاوي ته د ښه راغلاست ویلو ترڅنګ پر دوه اړخیزو روغتیایي همکاریو ټینګار وکړ او ویې ویل: افغانستان او روسیه ښې اړیکې لري او دا اړیکې د روغتیا په سیستم مستقیم مثبت اغېز کوي او موږ غواړو چې روغتیا برخه کې ستاسې له تجربو څخه ګټه واخلو.
بل لور د روسیې سفیر وویل: روسیه له افغانستان سره روغتیا برخه کې همکارۍ ته چمتو ده او زیاته یې کړه، چې د لابراتوارونو کیفیت لوړولو او افغان ډاکټرانو ظرفیت لوړونې موضوعات به له مرکز سره شریک او هم به روسیې ته د افغان پلاوي د سفر اړوند هڅې وکړي.
